Zordi dann in péi i apèl Pakistan, nana in madam dann in prizon apré aspèr son prosé an rapèl. Pars an promyé l’instans, in tribinal la kondane aèl a-mor. Pars nana ankor la pène de mor dann so gran péi-la, konm si in sosyété l’avé in droi done la mor d’moun. Mé pou an avoir kondane aèl a-mor, i fo kroir èl la fé in gran krime ! Kèl krime èl la fé ?

Madam-la la trap delo dann in sours ; El la boir in pé, épi konm dé madam té i pass, èl la propoz azot pou boir inpé zot tour. Èl i pratik la rolizyon bann krétien, lé dé z’ot i pratik l’Islam. Dézord la pété, pars lé dé madam i konpran pa in krétyène, donk in moun inpir pou zot i ofèr azot delo. In pé i di galman la sours lété rézèrvé pou bann mizilman, épi in krétien la poin lo droi boir sa. L’èr-la, lé dé kan la anguélé ; ala ké la maye la rolizyon anndan, é lo dé madam la port plint kont Asia, pars, solon zot, èl noré malparl lo profète Mahomet, é solon in loi, èl i mérite la mor.

La loi lété fé l’ané 1886 par in prézidan diktatèr, lé pi o-pouvoir dépi lontan, mé pèrsone i vé pa pran la résponsabilité pou kass son loi. Pars si ou i anparl de sa, bann z’intégris i zoué pa avèk ou. Sé pou sa lo gouvèrnèr lo Pendjab épi lo minis bann minorité la gingn la mor, vi k’zot la pran la défans Asia Bibi.
Pou kosa i fo anparl dé sa ? Pars dann son prizon, in madam i atann son prosé an rapèl ; Pars èl la pa fé krime ; pars la-ba, déssèrtin i ansèrv so loi-la pou règ in kont avèk in moun i plé pa zot, sansa na in dézakor ansanm zot.

Justin