Nou la pa vi ali,

Nou la pa vi Mandéla,

Landroi li lé,

Landroi li lé karséré.

Asimbonanga !

Sa in shanson lo group Savuka avèk Johnny Clegg. In shanson joli pou vréman, mé tris galman pars lo group i di konm sa li la antann parl Mandéla, mé li la zamé vi... vi k’lo ga lété anfèrmé dan la jol pandan vinn-sèt-an. Mèm zot té i koné sa in gran éro la lit kont lapartheid. An mèm tan, zot i pans tout bann éro konm Steve Biko... Victoria Mxenge... Neil Aggett, épi d’ot ankor. 

Epi, bann mor par santèn, pars in zour zot la rofiz lansègnman an afrikans. Mor par santèn, pars zot la rofiz port in pas-por pou alé dan bann landroi rézèrvé pou bann blan. Listoir la lit bann Sidafrikin lé ranpli kadav, kadav bann noir la rofiz la ségrégasyon... Sak la parti la-bà dann tan, mi pans zot i doi bien raplé : ban pou noir, ban pou blan, la plas pou noir, la plas pou blan, wagon pou noir, wagon pou blan, bar pou noir, bar pou blan, bazar pou noir, bazar pou blan, é antansyon pou sak i réspèk pa la ségrégasyon : la polis, la tortir, la prizon i atann azot... Antansyon si in noir i vé maryé èk in blan : défandi épi kondané. Si in blan i vé maryé avèk in noir, mèm tarif. Sak la parti dann péi-là dan bann zané soisant i doi sirman rapèl dé sa.

La mèr lé glasé, lo syèl lé gri konm l’asyé,

Rogard bien lil laba an travèr la bé,

Nout tout bannzil ziska lo zour,

Ni travèrs la mèr an ébilisyon,

Asimbonanga ?

Asimbonanga !

Justin