Mésyé, Médam, La sosyété, koz èk moin sé koz avèk in kouyon mé sé o pyé d’lo mir k’i oi lo bon mason. Zordi ni kontinyé vizite l’Afrik an provèrb : nou lé dann péi Bahava, dann La Tanzanie, in gran péi l’afrik de l’est téi apèl avan Tanganyka, la asosyé avèk Zanzibar pou done konm mi di azot La Tanzani. Mé kosa in provèrb konmsa i vé dir : dabor i vé dir in krapo i pé pran plizyèr pozisyon mé li rèss in krapo é ni pé z’ète dakor avèk sa partou,. Par l ‘fète néna in pé partou provèrb pou di dé shoz konmsa : par ébzanp pou dir in sha sé in sha é la pa moiyin fé shanj ali an shien ziska koméla. I di osi in shate i fé pa lo shien é in foi anplis moin pèrsonèl moin lé dakor avèk sa : késtonn sazèss élémantèr. Final de kont, ou i pé si ou i vé dégiz aou, makiye aou, fé konmsi, fé sanblan mé ou i rèss konm ou i lé natirèlman : bon si ou lé bon, mésan si ou lé mésan, in télizan si ou lé intélizans, bète konm in po si ou lé bète konm in po. Alé ! Mi kite azot rofléshi la dsi é ni artrouv pli d’van. Sipétadyé.