Eskiz mon pardon si mi anparl azot ankor zordi kékshoz la pa tro sèryé, mé sé in n’afèr i ramenn amoin dsi la koup kann dann tan lontan. Si mi tronp pa, moin la fine anparl azot bann zoinalyé téi sava gran bitasyon, an gran bitasyon pou alé koup kann épi, konm moin la di azot, ramass larzan pou sèye viv kék moi. Mé, kan ou lé anparmi, kan ou lé konm sélibatèr, kan ou la fine fatig aou in zourné, d’ran, lo soir ou i rode kékshoz i rosanm in lamizman.

Sé konmsa ké, kan téi ariv lo soir, inn i di l’ot, i di l’ot, i di l’ot é bann koupèr i rotrouv azot dann magazin pou fé in bouyé mayok. San kilo l’avé di : asoir mi amenn mayok, é zot i amenn do sik, é ni artrouv kan la klosh léhgliz-in sort kass marmite - va soné pou dir lé sizèr d’soir… Mé san kilo l’avé poin mayok é lo propriyétèr l’avé. San kilo la tienbo parol é kan lo soir l’arivé li l’amenn la fournitir. Paré pou lo mayok siro, paré galman pou la parti d’kart-in bann vyé kart karzé épi rotourné dsi lo bor. Mé kart sé kart é la pa bézoin rode linposib !

Kan mayok lé kui, tout i manz ansanm apré i shakinn i sava dormi pou lèv granmatin lo landmin. Mé la pa sa : moin la fine di azot San kilo na poin mayok é i fo lo propriyétèr i done ali, mé lontan téi done pa. Donk li téi rash o pyé épi li lèss lo boi débout. Si tèlman ké kan la koup lé fini, lo propriyétèr i sava son tour rash son mayok é la, sirpriz, pars i mank dann son rékolt. Mé kan i dékouv lo potoroz Sankilo lé pi la li : li la baré apré la pèye é pèrsone i koné pa par ousa li la pasé.