Oté

Asoir pou oir si gouvèrnman i pass bien l’éprèv di fé, sansa si li maye son pyé dan la bar é li pète dsi la boush

Justin / 14 octob 2020

JPEG - 43.6 ko

Mi sort antann lo prézidan La frans, i sava, pa pli loin ké asoir, koz ankor in kou dsi lo pandémi k’i kour épi dsi d’ot shoz ankor. In pé zoinalis, sak i fé la bou avan la plui, i komans dir gouvèrnman i sava pran ankor in bann mézir sèryé… Mi koné pa si lé vré, pars dsi mon tab travaye na poin-pou linstan-in boul kristal. Na poin non pli lo mar kafé pou pèrmète amoin lir dann l’avnir.

Avansa, moin la rolir in lartik dann Témoignages dsi Vietnam, in péi néna san milyonn moun, in l’androi i pé dir la lite kont lo maladi invizib té améné avèk in bone doz réisite é mi rodi azot lidé la vni dann mon tète kan moin la lir lartik-la.. Mi koné pa si banna, dann péi-la, la aplik in bon solisyon. Mé si lo solisyon té bon, ni pé dir galman demoun la pans lo solsyon té bon é zot la aplik sa san ral déyèr. Kosa nora spassé si solisyon té bon é si lo moun téi kroi pa té in bon solisyon, Mi pans in pé nora ral in koté, d’ot nora ral in n’ot koté ziska ké lo bon solisyon i vien o bou di kont in mové solisyon.

Zot i suiv amoin ? Mi pans ke oui, mé kan lo prézidan va kozé, lé sir mi sava ékout son voi, suiv son grimas, ékout son poinnvizé é lo tiktak li sava domann gouvèrnman pou apliké é pou sèye tir lo péi dann so lanboulkidi. Mé si sa voi i trok, si la solisyon li vé k’i aplik i diré k’ i tienbo pa d’bout, si li napoin la konfyans demoun, moin lé sir é sèrtin son politik anti kovid i sar kass ankor in kou son né par raport la konfyans demoun lé pa la, é pars li la pa nyabou sirmont lo andikap in gouvèrnman na poin la konfyans la mozorité d’moun.

Asoir, dovan zot post télé sansa zot post radyo. A domin pou oir si gouvèrnman i pass léprèv di fé sansa si li maye son pyé dan la bar.