Médam, mésyé, la sosyété nout tout l’aprann si nou la bézoin kékshoz i fo ni sava rodé pars la vi lé konmsa : zoizo frite i shap pa di syèl pou tonm tousèl dann out boush. Mé néna rodé é rodé, é si ni arvir dsi nout zistoir pyé d’mang : ou i pé alé rod dsou l’pyé si in mang la pa tonbé, ou i pé grinp dsi lo pyé d’boi é pi alé kass lo frui par ou mèm, ou i pé flank in kou d’galé é fé tonm lo mang. Anfin ni sar pa fé tout in fromaz dsi la késtyonn mang épi pyé d’mang. Pars zordi la pipar d’moun mi oi d’isi d’laba l’apré rode travaye é sa lé pa fasil : dizon ou i sar rode lo pou avèk lo lante dann la tète na poin shové mé mèm dann in ka konmsa néna plizyèr fasonn rodé. Mi yèmré plézant in pé la dsi, mé la pa bon pars tout bann rodèr travaye la plipar d’tan zot lé dann in ka fatigan épi mi vé pa konm i di aport dolo dann moulin bann profitèr. Na poin inn la di konmsa : « Ou na ka sote shomin pou trouv travaye ! »Na point in pé i di : « Ou i pans travaye va vni rode aou dovan out port ? » Mé si in zour-mi souète pa - zot i artrouv azot dann in difikilté konmsa si zot néna in pé la mémoir, mi souète zot va rogrète z’ot mové pansé. Alé ! Mi kite azot rofléshi la dsi é ni artrouv pli d’van. Sipétadyé !