In pé i di sa « profitèr », sansa « anprofitèr » sansa konm moin la di anlèr la « abizèr ». In l’abizèr sé in moun i profite son pouvoir pou mète in n’ot dann difikilté. Ni pé di ni viv dann in sosyété néna bonpé z’abizèr. Pars néna in bonpé d’moun dann in sityasion frazil kisoi pou in késtyonn santé, kisoi pou in késtyonn larzan, kisoi ankor pars zot sé d’moun atèr pou vréman. Abizèr ? Na poinn zami, na poinn famiy, li lé bon dann l’antouraz pli mové kan li lé tousèl. Bann nèrvis té in bann abizèr pou tap demoun, pou tyé d’moun ziska, dann tan l’avé in l’administrasyon voiyou isi dann nout péi. Pé sfèr in bonpé i an souvien pi ? I fo dir galman la pa ékri l’istoir nout péi bienémé kan li lété plonzé dann in tabltir konmsa. Sak i koné pa ransègn ali, mé sirtou si ou plé, mète pa toulmoun dann panyé zèf pouri. Epi lès spa nout listoir dann fé noir.