Zordi mi vé pa anparl toute kalité linégalité, épi toute kalité linzistis, mi vé anparl linégalité épi linzistis dann la formassion épi linformassion.

Mézami issi toute demoune néna télé, toute demoune néna téléfone antouléka prèss. Toute demoune i pé suiv in fèyton é konprande kékshoz a sa fasson. Mé sipozon dann télé néna in l’émission syantifik konm la konkète léspass — trozour l’avé sa dsu ARTE — in lémissyon bien fé, bien dokimanté, avèk bande zoinalis syantifik la parti in pé partou pou konprand lo « problématik ».

Dizon demoune issi la Rényon apré suiv sa : an parmi néna sak la réissi lékol sansa linivèrsité, épi sak la pa tro réissi. In pé i konpran pa mal sak i di, mé d’ote in konpran pa in grin. Poitan lé z’inn é lé z’ot i pèye zot télé… Sak i konprann a popré é sak i mète sa an mémoir zot lé kontan d’zot, zot lé gratifyé. Zot i pans mon zoiné té pa initil é mi éspèr in n’ot zour m’a oir d’ote fime pou rouvèr in pé mon léspri dsu bande problème koméla. Astèr sak i konpran pa in grin pars problème la lang, pars nivo syantifik i di kossa,,. zot i di alon rogarde fèyton pars mi konpran pa inn tyork, sansa alon gard foutbal — balon lé ron pou toulmoune.

Mi note néna mèm poin in pti léfor pou koze dan la lang lo dézyèm katégori d’moune kissoi dann la lang kréol rényoné, kissoi dann in langaz sinplifyé pars pou in pé opliss lé difissil, opliss lé konpliké, opliss sa lé valab… koman i pé apèl in n’afèr konmsa ? Mi di linzistiss, mi di linégalité, mi diré mèm sa i apèl léskrokri.

A bon ékoutèr, salu !

Justin