Mwin la shanj médssin référan, an dë tan troi mouvman — é lo tan mi rofléshi, lo tan mi di mwin lé dakor lo kou té parti, mwin l’avé shanj médssin. Doktèr-la la di amwin si mi vé roshanjé sar ossi rapide ké la promyèr foi. L’èrla mwin la gingn la tranblade.

Si mi di azot, apréssa mwin té trakassé, zot va dir amwin : « Kass pa la tète ! » konm in lémission radio i di… Kass pa la tète ? Promyé foi dann mon vi mi domann amwin kossa néna dsi mon karte vital. Kossa néna ki konsène amwin é pétète ké mon idé lété pa dir zamé doktèr-la déssèrtène shoz. Garde sa pou mwin, amenn sa avèk mwin l’ote koté la vi.

Dopi tan-la shak foi mi sava doktèr, mi garde ali émi domann kossa li koné dsi mwin ké mwin mèm i koné pa, sansa mi rapèl pi… Fransh vérité néna dé foi mwin néna anvi pèz dsi la ké pou oir si la tète i bouz. Mi majine mèm, laz mwin néna, mwin lé sirésèrtin néna in roman « les misérables » dann pti karte-la.

Astèr mi di dann mon kèr, lo pir lé kapab vénir. Lo pir sé kossa ? Sé kan mon karte didantité banna i maye sa avèk mon karte vital. L’èr-la oussa i sa trouv ankor lo ségré médikal si la banke i koné kèl maladi mwin néna, si mon zour lé konté, si prète amwin larzan sé tir azot in bal dann pyé.

A partir d’la na pi arien pou arété : akoz pa mète mon kondanassion si mwin néna dsi karte-la ? Akoz pa mète mon dète, avèk mon lintèrdikssion fèr sessi, é fèr sela… Mézami kissa rantre nou i aksètré ké ninporte ki-kissoi la poliss, kissoi lo bankyé, kissoi lo médssin, kissoi lo vizile i pé lir dann noute vi konm dann in liv ? Pti karte mwin la bien anvi déshire aou.

A bon antandèr, salu !

Justin