Biensir sak mwin la ékri la pa toush lo pti doi d’pyé lo gran blan La franss la anvoye pou gouvèrn La Rényon — mi di gouvèrn mé i paré i fo pa dir sa pars na pi gouvèrnèr koméla, néna arienk Préfé mé sa i shanj pa lo sor bonpé rényoné. Sirtou sète i soufèr bokou par rapor la rogoumantassion bann produi pétrolyé épi lo rèst bien antandi.

La si tèlman pa toush ali ké li vienn anonss bann pri i sava ankor goumanté kan v’ariv moi d’mé touzour pou lo mèm rézon é pars i fo aplik lo mèm métode lo l’éta lokal la désside anploye issi la Rényon pou fiks lo pri bannprodui pétrolyé.

Poitan ni koné Lékonomi rényonèz lé an kriz é pa arienk dopi moi d’avril. Ni koné la kriz i frap la popilassion é biensir na pwin zétide pou dir ziska kèl dégré la popilassion i sava ète toushé. Alor, olèrk shanj métode i kontinyé aplik lo mèm métode é tanpi si nout pèp i sava anfonss in pé pliss dann la kriz.. Arzout èk sa na pwin pèrsone pou ésplike anou nou na pwinn solission…

An fète mi panss la vi lé si tèlman shèr ké la popilassion lé pa an éta d’siporte ankor pliss la vi shèr ké li siporte koméla. Mi panss èl lé o boute lo roulo konm in pé i di.

Biensir mi trouv méritan ké bann zélu i sèye apèz in pé la soufranss demoune an gratan in pti katsou par issi par laba, mé mwin lé pa sir la politik pti katsou i sar éfikass-in pansman la zamé soign in zanm doboi !-. Mi kroi pa pars mwin na poin konfyanss dann lo sistèm néokolonyal i inpoz anou dopi dé tan é dé tan.

Mi di sinploman : « afors alé a lo kalbass i pète » é sé sa la vérité fondamantal. A bon antandèr salu !

Justin