La Rényon, nana san-kinz mil pèrsone dann shomaz, sé dir si in travay sé in n’afèr k’i konte, sé in n’afèr inportan. La Rényon, nana galman plis san-dis mil pèrsone lé ilétré, sé dir si lédikasyon bann zanfan, si la lute kont lilétrism sé in n’afèr inportan… Donkalor, in l’anploi, i fo ou i vèy sa konm dé-lé dsi l’fé. In l’anploi dann lédikasyon, i fo pran ankor plis prékosyon èk sa.
Dépi kèk moi, bann l’assistan lédikasyon l’apré sèy fé konprann Réktora, la mèm sèy fé konprann Promyé ministr kossa zot i fé é pou kossa z’ot travay sé in n’afèr i fo manyé avèk réspé. I pé pa dir zot la pa byin éspliké, kan déssèrtin la byin vouli ékoute azot. Pars in pé la mèm pa koz avèk zot, ékout azot kansréti in pti n’instant. Kan zot lété k’i kanp dovan la Préfèktir, méssyé Préfé té k’i rante, té k’i sorte dann son shato, san zamé vnir oir azot in n’instan, san zamé intérèss sak zot i fé dann lékol.
Kan i koz èk zot, zot i parl in pti pé déssi z’ot déstin, mé sirtou zot i anparl bann zanfan sak lé dann malizé, bann paran sak i konpran pi kossa i fo fé pou z’ot marmay. Lo bann amontrèr k’la bézoin z’ot sèrvis.
Pou moin, banna nana konm l’idé lo métyé zot i fé — métyé k’zot la fé ! — sé konm in vokasyon, konm in sèrvis zot i rann la popilasyon, in sèrvis zot i rann z’ot bann konpatriyote. Bann moun-la-ote, pou z’ot par, i pans sa sé solman in fasson pou banna gingn z’ot sosso. Aryink sa ! Lo rèst i anvoy baladé. Lo rèst i anvoy fèr foute. Alé oir, lo rèst, zistoman sak bann gran grèk i vé pa konète, sé z’ot kèr d’métyé, sé z’ot métyé dann kèr !

Justin

Lésplikasyon inn-dé pti mo :

Galman : ossi.

Donkalor : alors.

Dann malizé : dann difikilté.

Bann : i ansèrv pou mark lo pliryèl.