Mézami, mi koné pa pou koué toudinkor kozman-la i vien dann mon tète ! Pétète in moune la fé amwin in krass é sé pou sa mi majine in provèrbe l’afrik k’i di konmsa : si in moune la fé aou in krass, rode pa pou tir vanzanss, assiz dsou pyé d’boi épi rogarde lo flèv : wi tard ar pa pou oir kadav oute l’énmi passé.

Astèr mi kalkil kossa sa i vé dir é d’apré mwin sa i vé dir pou vanz aou ou la bézoin in démarsh aktiv, la passyans l’assé. Zot i koné la passyans i guéri la gal, é zordi ni oi la passyans i pèrmète aou amontr ou néna rézon par raporte in moune momandoné la arvaz aou. Inpé vé dir, lo flèv final de konte sé lo ziz do pé. Sé li k’va désside kondane lo koupab pou linossan gingn son ropo.

Mwin pèrsonèlman mwin lé pa kab ziz la zistèss in parol konmsa ; si sa i ariv mwin lé paré pou dir sé in koinssidanss mé pa pliss. Azot de oir kossa zot i anpanss é an atandan ni rotrouv pli d’van. Sipétadyé.

Justin