Oté, lé ga ! trann-troi mil l’euro, sa in bonpé larzan sa ! I trap pa sa sou la pate shoval ! Épi i gingn ashté zafèr ansanm in paké larzan konmsa. Azout ankor, lé dir pou kashyète sak ou l’ashté !
Lé konmsa dann tout kartyé, lé konmsa pou tout demoun. Sé sak mi kroi, sé sak moin té i kroi ziska so matin ! Mé dopi so matin, mi kroi pi tro ! In ! Akoz mi kroi pi ?
Sé par rapor nana in landroi lo mèr té i vé fé in travay sérié, konmsa kan la plui i tonm for, la popilassion lé o sèk. Sa in bon lidé sa, pars mi pé dir aou, kan delo i mont la koko ! É bin ! ou lé pa alèz... ou na la krintiv linondassion, ou i kroi près nana in nouvo déliz .
In bon lidé, moin la di : pour sir sé in bon lidé ! Mé si i fé pa lo travay, sé konm si arien n’été. Si ou ashté matéryèl konm k’i fo, lé bon ! Mé si matériel i ariv pa landroi i doi fé lo travay ? La lé mol ! Si i disparète pou in rézon k’ou i koné pa, la lé ankor sipèr mol !

Sirpriz ! Sirpriz ! Bann sèrvis la komine la sèy oir si lo travay an prozé té fine fé : zéro kalbas, la ké mimite ! Alor, la sèy oir si lo matéryèl lété la, dann in dépo, sansa sou in bash ? La ké mimite, zéro kalbas, lo zafèr la baré. Éstèr, si la pli i ariv, in pé dmoun lé riskab ète inondé ! Pli pir, koman ou i sar ashté in n’afèr dë foi ? Tansion, la prizon Domendjod lé riskab rouv lob ra pou kapaye aou... Touléka, lo mèr koméla, Eric Fruteau, la di li va mète lafèr dann min la loi ! Ariv sak va arivé !

Justin