Oté i prétan rant lo minis dé loutromèr èk lo prézidan la rézyon rényon na pi ryin dbon, néna d’lo dann gaz, inn i vé pi santi lot. Dann lédito in zournal samdi i rotrass byin lo dézamour rant lé dé. Rasir a zot la pa nout zournal témwaniaz i di. I prétan zis apré in visit dann biro la minis, tou lé dé la ral lo kont si la kontinité téritorial, shakinn i rakont son manièr, shakinn i larg la fot si lin a lot. Inn i di léta i dovré péy vwayaz pou tout domoun, lot i réponn, arèt tiliz larzan la rézyon pou fé zéléksyon. Boudikont in postir préské normal vik inn lé a drwat, lot lé a gosh i di.

Lo zournalis, konm si li té i vé rotourn lo kouto dan la plé, li di : « Zamé tou lé dé va antann, télman la soss lé finn gaté rant zot, moman doné i fé sanblan antann, mé i dir pa ditou ». Li la trouv lo mo i konvyin, li di rant lé dé lé épidérmik. Poukoué li di sa ? Parské pou li i pé pa èt politik vik Didié Robert lé dovni prézidan la rézyon an mars 2010 èk solman 45 pour san sifraz, li la rantré parské bann sosialis la pa zoué la kart dé linyon dé la gosh èk lo PCR. Mi rasir a zot ankor, La pa témwaniaz la ékri.

Mi antan pa bann dépité sosialis la dsi. Kosa zot i panss ? Kisa na rézon GPL ousinonsa lo prézidan ? Eklèr in pé nout lantèrn. Tanka misié lo sénatèr sosialis do lèss, ousa ou lé, mi antan pi parlé. ? Fransh vérité mi vé pa donn loson madam la miniss, mé pou règ lo kont lo prézidan la rézyon odrémié pa tro baz si banna. A nou osi konm lo zournalis ni konpran pa touzour poukoué banna la donn la rézyon didier robert an 2010. Pétèt pou vanjé ? Astèr siport zot maléré sor !