Médame zé Méssyé, la sossyété zot i koné kossa i lé train onz ? Train onz sé kan wi sava a pyé. I di ossi wi bate a pyé.

Lé drol toute sak avan lété in l’obligassyon, koméla sé léspor, sansa lo plézir. Fransh vérité, mi pé dir azot sorte dan lé-o pou al an-ba, kissoi dan la pli, kissoi dann solèye lété pa in plézir é la plipar d’tan téi mète pa ou bone imèr ditou. In lobligassion, in plézir konm lé shoze la shanjé pou vréman. Mé kom demoune i yème farssé, sa lété lokazyon pou viv in lavantire réèl sansa invanté. I paré in moune l’avé in gro panyé bazar dsi son tète é li té i sorte dan lé o po alé vande sa dan lé ba. In moush i suiv ali dann son parkour : tazantan i tourn otour d’li, tazantan i rante dan son zorèye épi son né. Anfin téi rande ali la vi inpossib é pa moiyin poze panyé atèr, pars noré té inpossib romète dsi la tète. Koman-koman li fini par ariv in landroi néna d’moune é inn i done ali kou d’min pou poz panyé in néstan. Sé l’èr li sé d’trap lo moush, rash lo zèle épi li di : « Astèr wa bate a pyé. ».

Si zistoir lé mantère, la pa mwin l’otèr.