Oté

« Atann grinn zak bouyi ! »

In kozman pou la rout

Justin / 12 octob 2019

JPEG - 43.6 ko

Mésyé, médam, la sosyété koz èk moin sé koz èk in kouyon-sé o pyé d’lo mir k’i oi lo mason. Pé s’fèr zot i koné pa kozman-la : sé konm in l’invitayon rèss ankor in pé épi rèss an parmi l’moun. An kontrèr si ou i atann pa grinn zak bouyé dizon ou i vien solman pou pran in pé d’fé : zis lo tan pou pran in tizon d’boi, sansa in nik zalimète. An parlan zak-la sa in frui bandé kisoi zak dir, kisoi zak soso, li lé bon pou fé kary avèk in bout boukané do préférans, kisoi pou manz lo gous, kisoi mète ali an konfitir, sansa fé bouy son grin é pétèe fé rougaye ansanm.I pé mèm ansèrv bann zanimo : bèf i manz bien fèye zak, é la po lé bien roshèrché dann manzé… Koméla in pé i fé ti-boush avèk sa, zot i souplègn pars néna la kol dan la po, pars i san for dann frijidèr mé konm i di : « si ou i yèm pa, asiz a koté ! ». Moin pèrsonèl dann mon famiy zak lé roshèrché sa é li la fé d’bien mon boujaron é pa arienk in kou. Alé ! Mi kite azot rofléshi ladsi é ni artrouv pli d’van. Sipétadyé !