(Page 16)

Kan mwin té ti, navé lo trin, mi rapèl ankor. Mwin la zamé konpri akoz na pi lo trin.
Mi konpran pa non pli akoz zordi lo minm bann la tak lo trin, i vé blok lo tram. Amwin mi roul pa dann loto, ni moto, ni vélo. Mi tras a pat, oubyinsa mi attann lo bis.

Olié batay pou blok lo tram, akoz banna i prépar pa zot akèy domoun va prann lo trin pou alé in bout a lot La Rénion. La pa èk lo sistinm lo bis konm i lé zordi va giny anpar bann dizinn milié pèrsone i sa déplas domin, san loto, san moto, san vélo, san la rou.

Na tro loto La Rénion, sitantèlman na pwinn asé la route. La ou antann inn dir lès moitié la route pou lo bis. Kosa va fé sinon in kanal bishik toute otour La Rénion. Ou krwa sé pa déza in bèzman 4 èr lanboutéyaz toulézour pou sak i mont travay. Tout so bann zèr i fatig la tèt, i kass out moral é tout la famy i anpar lo shok.

Mé lo tram i trapra pa mwin dovan la kaz pou anminn amwin dovan biro oubyinsa bor la mèr. Lo bis, nou lé dakor, i marsh ansanm, i pous avèk. Alon kalkil in bon syonaz pou nout marmay démin. Attann pa tro, Justin fine ariv 60 an, fé manyèr avan pa lontan, apré lo trin, li giny war pass lo tram.

Justin