Oté

« Atann so soir pou di ou la pass in bon zourné. »

In kozman pou la rout

Justin / 12 out 2019

JPEG - 43.6 ko

Médam, mésyé, la sosyété, zot i koné bien défoi i pé ariv aou dann out zourné kisoi in gayar zafèr, kisoi in n’afèr in pé dézagréab si tèlman, sanm pou moin, i fo pa dir moin la pass in bon zourné, konm i fo pa dir moin la pass in mové zourné avan lo zour la fine lav son pyé épi mète son tète dsi zoryé. Si mi di azot sa sé k’moin la fine fé désèrtènn zéspèryans dann lé dé sans é mi pans zot osi la fine ariv azot dé zafèr, konm mi di dann lé dé sans : in zourné an zobok i pé bien tèrminé si in moun ou i yèm bien i rann aou in vizit l’amityé, i pé mal tèrminé si ou i aprann in mové nouvèl. Zot i oi, mon bann dalone é dalon, la vi sé in l’avyon san pilote, é sirtou pa nou k’i kroi k é ni kontrol nout vi alé oir non : si ni fé in plan dsi la komète lé pa rar lo plan i foir dann tout lé grann larjèr. Mé par l’fète sa sé in provèrb sa donk li néna in sans kashé é l’èr k’mi ékri mi oi pa sans-la. Alor, mi kite azot rofléshi la dsi é si ni trouv pi ni ékri. Alé ! Ni artrouv pli d’van. Sipétadyé !