In sèrtin tan, moin té I pans sa té lo méyèr provèrb pou dmoun inportan isi La rényon. Par l’fète, moin nana in bonpé l’égzanp dann mon tèt demoun, l’intélizans téi kas pa lo kat pat in kanar é poitan zot té okip bann pos épi bann fonksyon inportan. Mi sava pa nonm inn-dé nom pars mi pans dé z’afèr : inn si ou lé pa sir ou mèm ou sé in moun valab ou i ézit avann krétik lé z’ot pli ba ké la tèr ; dé sé ké dann tout kalité d’moun nana in kapasité ké ni dovine mèm pa.

Konklizyon : i fo ziz lo moun suivan lo rézilta d’sak li fé. É pa dsi sak ou I éstime li lé kapab osinonsa pa kapab fé Mé nout proverb lé la é I fo di in n’afèr dsi : in bourik sé in bourik é in shoval sé in shoval ; dann nout léspri in bourik lé moins valab k’in shoval mé si ni donn ali son gallon bourik I pans li lé osi valab k’in shoval, ké li mèm sé lo shoval.

Kosa zot I anpans ? Arien ditou ? Fé travay z’ot koko, fé bouy z’ot matyèr griz ! Zot va oir, ké, rant-rant, ni pé z’ète, tazantan, dakor rantre nou.