Médam zé méssyé, la sossyété koz èk mwin sé koz èk in kouyon, mé sé o pyé d’lo mir k’i oi lo masson.

Mézami mi panss mwin la fini anparl azot kozman-la, mé mi yèmré anparl ankor in kou pars pou mwin sa sé in kozman k’i va bien avèk noute sossyété, avèk déssèrtin moune, dann in sityassion nout péi lé d’dan.

Biensir mi konfonde pa lintélizanss avèk la kapassité lomoune é kan mi di sa, lo moune la pwindiplome walka ké li panss lo diplôme i vo pa arien. Mi site pa lo nom pèrsone, mé i fo bien ni romark néna déssèrtin moune tazantan i mète azot pou okipe in plass alé oir normalman zot lé pa an éta d’okipé.

La pa toultan sa i ariv, mé défoi sa i pé arivé...Biensir kan sa ariv ala ké lo moune i gonf konm in mal-dinde é si par azar sé in plass zot la gingn par piston, wala ké zot i trouv azot zénial vèye pa koman...Wala ké bourik zot i pran azot pou shoval.

Alé ! mi kite azot rofléshi la dsi é ni artrouv pli d’van, sipétadyé.