Mézami mi panss mwin la fine di azote di bande demoune la invante noute bande kozman, souvan dé foi, zot lété bande bon zobsèrvatèr la sossyété. Avèk troi-kate pti mo bien plassé zot téi koné fé lo tablo bande féblèss, bande défo lo moune dann la sossyété ni viv.

Mi pans zot i koné kossa i lé in kalèsh. Si zot la pa vi an vré, mwin lé sirésèrtin zot la vi dann zarshiv lontan. La pa ninporte ki l’avé kalèsh… la plipar d’tan lété demoune rish - bande blan konm nou téi di. Alor zot téi pran lo pli zoli shoval pou atèl avèk lo voitire é sirman pa in bourik, mé si l’avé atèle in bourik mi di pa zot lorguèye bourik-la.

Antouléka, d’apré mwin.

La pa bézwin alé bien loin, pars issi même, shé nou, tazantan-même souvan – i konfyé bande de moune inkapab déssèrtin rol inportan é kan la fine konfyé azot sa, zot i kroi azot mèm lo « féniks dé zote dé sé boi »konm lo gran La fontaine noré di. Sa lé pa vré toultan mé tazantan sa lé vré pou d’bon. Alor lo moune shoviye i grossi. Alor lo roi la pa son kouzin.

Alé ! Mi kite azot rofléshi la dsi é ni artrouv pli d’van. Sipétadyé.