La vi bann Rényoné lé marké par in bann gran fète kiltirel épi kiltyèl. Sa lé inportan par raport nout Listoir, dann parkour la fabrikasyon nout pèp rényoné, la nésans son kultur. Lakèl an parmi lé pli inportan, lakèl lé moins ? Pou réponn in késtyon konmsa lé bien difisil, pir k’sa in répons sré déplasé pars sré in manyèr konpar bann kiltir é bann kult rantre zot épi an avoir la prétansyon di lékél i kont plis, lékél i kont moins lékèl lé supèryèr, lékèl lé inféryèr. Mi souvien kékshoz révolisyonèr dan la shart la MCUR, kékshoz té i di konm de koi na poin in kiltir infèryèr, na poin in kiltir sipèryèr. Tout lé égal é tout i doi an avoir lo mèm konsidérasyon... La plipar rant nou i koné bann gran fète krétien. In bonpé Rényoné i koné bann gran fète tamoul... apèl sa indou si zot i vé. Ni koné désandan bann Shinoi nana osi zot kult Bouddha. In pé partou nana kabar, na maloya san konté son koté rolijyé.

Dimansh k’i vien, mi éspèr, in bonpé d’moun v’alé dan lé o L’Antré-Dé, dsi plato Dimitile pou fé Ati-Damba. Kosa i lé sa ? Sa in fète malgash inportan vi k’sé lo rotournman d’kor épi lo ronouvèlmann lamba. Issi, dann Dimitile, sa i pran in tournir pli sinbolik ankor pars i mète sa sou lo sign bann zésklav Malgash la parti maron, épi lé mor san an avoir in sépiltir korèk é san pèrmète azot rant dann ron zot bann zansète. Donk kan i fé Ati-Damba, dsi plato Dimitile, sa i vé dir k’i ronouvèl lo lamba dsi l’moniman la drésé, dsi plato Dimitil. Sa i done osi l’okazion pou sak lé solidèr manifès zot solidarité, sak bann Malgash i apèl lo "fihavanana" donk la solidarité dan la lite.

Pou sak i aprésyé Listoir La Rényon mi pans sé l’okazion pou rann in l’omaj plis ké mérité, pou bann shèf konm Dimitile, Laverdure, Cimendef épi bann fam la travèrs Listoir pou vni ziska nou konm Héva, Rahariane épi d’ot ankor. L’èr-la zot i konpran bien, nou lé pi dann folklore konm in pé i pans, nou lé dann Listoir é dann in Listoir pandan lontan déssèrtin la kamouflé po obli lo rol bann rézistan la zoué dann la formasion lo pèp Rényoné. Ati-Damba, in fèt pou bann Rényoné, in fète i fo pa obli sélébré. 

 Justin