Oté

"Avan di for i san mové, rogard dsou out savate pou oir si lé prop" :

In kozman pou la rout

Justin / 30 novanm 2020


Médam, zé Méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson. Konm i di, éskiz mon pardon, mi di sa pou toutt sak i yèm solman tir défo inn, tir défo l’ot, fé ladi-lafé dsi inn é l’ot, i diré défoi zot i pans demoun i done azot rézon. Pétète lé vré, mé pou mwin sa lé pa vré, pars mi di dann mon kèr si i tir défo in moun dovan mwin, lé sir i tir mon défo kant mon do lé déviré. L’èr-la, mi di dann mon kèr bann tirèr défo, kozèr pou bate la lang, zot i pans vréman zot na poiin défo, na poin féblèss. Si zot i oi lézot ba konmsa, mé koman zot i oi azot don. Mi koné kréol sé in rass kasèrlé kui, mi pans mèm sé sa k’zot i fé lo myé mé ousai arète la plézantri é oussa i komans la méshansté ? Dé foi lé difisil oir sa takotak. M’a dir azot fransh vérité, mwin ossi mi yèm ri, dsi la boss in n’ot, mé néna ri é ri : néna lo rir san zaryèr pansé é ,néna lo rir i abèss. Sé pou sa, si in zour mwin néna in konsèye pou doné mi diré alon méfyé lo tro kassaz lé kui, pars sé in n’afèr i pé fé lè la guèr san k’i atan. Alé ! mi kite azot rofléshi la dsi é ni artrouv pli d’van. Sipétadyé,