Dimansh moin té apré ékout in diskour an kréol promyé minis Maurice, Pravinh Jugnaut, dovan in kantité pèrsonalité téi roprézant lo péi. Dann télé Maurice, Initil dir azot, mé m’a dir kant mèm, promyé minis morisien i koz kréol morisien – in siman pou l’inité nasyonal - shak foi néna in gran lokazyon li koz kréol morisien… In légzanp pou suiv sa, zot i pans pa ! Toudinkou li parl linité nasyonal konm in mir solid paré pou réziss kont bann tète brilé i vé kass ali. Sé konmsa ké li lans pti provèrb lé marké an-o la.. Mi pans sa i pé fé rofléshi anou, nou k’lé kant mèm in pé divizé. In pé divizé zordi ! Mé domin, akoz pa ini. An touléka sé sak ni pé aspéré pou nou, pèp rényoné. Alé ! Mi kite azot rofléshi la dsi é ni artrouv pli d’van. Sipétadyé.