Mézami, zot i antan parl élo zafèr d’covid é si zot i ékour bann radyo moin lé sir zot i fé port lotèr dsi kréol. Demoun la pa mète mask ! Demoun la fé la fète san niyans ! Banna lé in konsékan ! Moin lé sir zot i sava mète lo moun dann l’annuiman ! Préfé la di, madam ladousèr la di ; minis la di étsétéri étsétéra, la ké lo ra konm nout dalon Danyèl H onoré téi di dann tan on vivan !

Poitan, sak i ariv zordi, la pal o rézilta bann désizyon in pé la pran é la pan ou, rnyoné la pran sa. Kisa la vouli rofé démar lékonomi san pèz lo pour, san pè l kont. Kisa la donn lo droi épi lo moiyin mil sink san pèrsone débark La Rényon shak somenn : la pa moin, la pa ou, la pa li, mé sinploman sak néna lo pouvpoir fé. Alor kisa l’otèr astèr, sé bann viktime ?

Lé vré, nou kréol, antouléka bann pli bavar rantre nou néna poin toultan bon l’abitid : ni pans kékshoz i égzis pa si ni oi pa li, é lo bébète an késtyon lé invizib é konm li lé invizib ni pans li égzis pa. Pou ashové momandoné la di bann jenn i tonm pa malad èk sa é kisa la di ? La pa nou ! Sé bann tète dézèf i konsèye gouvèrnman la di sa… Mi fé pa in mové prosé désèrtin, mé si ni rapèl bien, bann moun otorizé téi fé kour bann drol de brui . Zot i rapèl sa ?

Arzout èk sa, kisa téi koné pa arien é téi fé konmsi zot téi koné. Kis téi donn demoun in lign konduite san savoir si sa lété éfikas osinon pa ? Mi vé pa dir pars banna lé résponsab i fo ni fé ninport de koi, i fo ni fé konmsi la maladi lé pa la, mé la vérité sé kant mèm la vérité : i larg pa in troupo d’moun i pé z’ète malad dann in kantité d’moun bien. Sé zot v’amenn la maladi é fransh vérité sé zot ké l’apré amenn sa.

Konm la shanson i di : « Kisa la di, kisa la fé, kisa la pa fé ? ». Daonk plito akiz anou par nou-mèm alon sèye démaye lo vré avèk lof o. Sirtou alon pa sèye mortifyé anou é si posib alon lir Témoignages avan.