Mézami, provèrb-la sa in provèrbe Haïti, mé konm mi di souvan sak lé vré laba, lé in pé partou. Pars in pé partou i grinp dsi pyé d’boi é malorèzman in pé partou i ariv a tonbé, sansa i koné pi koman i fé pou déssann. Mwin pèrsonèlman l’ariv amwin grinpe dsi pyé d’boi é pa trouv pozission pou mète mon pyé avèk mon min pou gingn déssande atère-antouléka kalkil in bonpé avan trouvé san pran in risk initil-é mi panss mwin lé pa toussèl.

La nou lé dann sanss prope, mé ni koné bien in provèrb néna an pliss ké son sanss prope in sanss figuiré, in sanss pli zénéral valab pou noute vi dann la sossyété. Dann in ka konm sète ni sorte oir lo sanss figuiré sé d’alé pa mète aou dann in sityassion inpossib é sirtou san solission d’rotré-san in plan B si zot i vé. Mi panss zot i konpran amwin bien.

Alé ! Mi kite azot rofléshi la dsi é ni artrouv pli d’van. Sipétadyé.

Justin