Fitintan bann péshèr té i pass tramaye dann brizan. L’avé lo tramaye épi bann batèr d’lo : té i apèl konmsa sak téi bate dolo avèk in baton pou pous poisson dann tramaye. Sak la vi sa, i pé dir banna téi mète sapate, in sort mové soulyé tiré dann la rou loto gatiré avèk la kord shoka. Arzout èk sa in lanba pou protèz in pé z’ot ban parti. Oplis lo sapate té bon kalité, oplis lo batèr lété bien ékilibré é lo kou d’ baton té bon pou shass poisson dann tramaye. Oplis lo sapate lété mové kalité, oplis lo batèr té i tienbo pa bien l’ékilib épi son kou d’baton té pa éfikas pou d’bon. Ala pou kosa nout kozman i di bien sak li vé dir : in mové zoutiy i fé pa in bon z’ouvriyé, in mové sapate, sansa in boi tro mèg i fé pa in bon batèr d’lo. Donk nout kozman i invite sak i kritik a ésèy par li mèm l’ékipman sak lé dann fé d’lo laksyon. Alé ! Mi lèss azot réfléshi la dsi é ni artrouv pli d’van sipétadyé.