Moin lé sir sa in n’afèr toulmoun i di zot i konpran pars kisa i konpran pa in n’afèr konmsa. Ou pran lo kar, si lé pa l’èr ou i atann san fin, si ou i ariv apré moungué pou ou, lo kar i pass sou out né.

Lé parèy pou in ta d’zafèr : si ou i rate in bon l’okazyon, l’okazyon-la i arvien pi. Solman si lé pa out l’èr, ou nora bo aspéré, la pa out l’èr pou vréman. Astèr, l’èr-la, sa lé pa parèy pou toulmoun : in pé i marsh avèk l’èr lé marké dsi révèy, na d’ot i fyé dsi lsolèy, dsi zétoil sansa dsi zot anvi. Si tèlman k’in moun i ariv an rotar, li lé pa kontan pars la pa atann ali-dizon pou li, l’èr toulmoun sé son l’èr ali, ali mèm lo paramète.

Parèy pou sak i ariv avan l’èr, zot i konpran pa pou kosa i komans pa l’èr zot i ariv. Kosa zot i anpans ? arien ditou. Kalkil in kou, fé travay zot koko, fé bouy zot matyèr grir, zot va oir si rant-rant, ni tonm pa tazantan dakor rantre nou.