Tousa pou dir l’èr sé l’èr. Mé lé kant mèm in pé drol dir in kékshoz konmsa dann in péi konm La Rényon ousa demoun i réspèk pa tro l’èr é dopi lontan : l’antèrman ? Katrèr pou sinkèr. Pou lé z’ot shoz nou lé soi tro an avans soi tro an rotard. Dann provèrb-la, an kontrèr, l’èr lé konm in vré l’épé damoklès dsi nout tète, in gran ménas i pèz dsi nou. L’èr, lé konm in diktatèr, é mi pans kan ni réspèk pa li, lé konm in manyèr pou amontr nout rézistans. Lé vré na in l’èr pou tout shoz, konm i di in l’èr pou lé brav mé a bien kalkilé souvan dé foi sa la pa sèryé pou toulbon dann sans la pa in késtyonn vi ou d’mor.

Kosa zot i anpans pou z’ot par ? Pétète zot i pans la klosh madam Desbassyns la fine rouyé dopi lontan, donk larg nout l’ourlé. Pétète zot i majine sa, mé soman avèk in pti pinsman dann kèr si par ébzanp lo tan lontan i rovien.