Na poin lontan, in lékip zournalist la sort la Frans la-ba épi la vni La Rénion pou oir do pré nout plan pou dévlop lénèrzi prop. Lé bon dé foi fé konète bann média déor sak ni fé issi. Lé bon galman si sa i pé goumante l’ède Lérop sinon l’État i pé donn anou pou pèrmète anou alé pli loin, alé pli vite, touléka pran kan k’i fo lo bon désizion.

In pé i pé di : « Oté ! Kossa la fé ? Banna shoviy la gonflé ! Pou kossa zot i pran azot ? »... Non, la pa in késtion n’shoviy, akoz ni koné bien nana in bon pé péi i travay dir pou ranplas pétrol èk sharbon par bann lénèrzi prop. Solman, si ni pé donn azot in lidé, si zot i pé pran modèl déssi nou, konm nou lé paré pou pran modèl déssi d’ote, sar bon pou toulmoun.

Momandoné, i fo nou lé paré, i fo nou la fine gingn nout bon rézilta - sak lé bon pou nou lé bon pou lé z’ot -... Avan l’èr la pa l’èr, mé apré l’èr la pi l’èr.

Justin