Mi pans zot i rapèl diskour lo Prézidan, kan li la déklansh la guèr kont lo Kovid. In pé plis demoun té kapab kroir sak li t’apré di. Li t’apré di lo tan d’apré sar pi ditou parèye lo tan d’avan. Donk l’avé in tan avan lo lépidémi, é nora in tan d’apré lo l’épidémi.

Mé oila, kozé lé bon mé fèr lé méyèr. Pars moin lé sir in pé la gob bann parol prézidan konm i gob zèf kri. Zot la pans lo prézidan l’avé plis in tour dann son sak, konm in moun néna vizyon, li té déza fine kalkilé kosa li téi sava fé plizyèr moi apré. Mé la vérité, sé ké li l’avé poin okin tour dann son sak, é sèl zafèr li téi pans sé fé in dézyèm manda.

Mé antansyon bann fransé la kroir in landmin k’i shant é landmin i shant ar pa ditou si lé shoz i kontinyé konmsa… Koman fé sak lé nèv avèk sak lé vyé ? La répons lé sinp : i gingn pa. Sak lé vyé lé vyé é kont pa dsi li pou ète nèv. Sak té vré avan lépidémi, lé riskab ète ankor pli vré apré lo lépidémi.

Pou nou isi lé shoz lé sinp : lo sistèm kass kassé va rèss kass kassé. Lokazyon nou l’avé lé riskab ète in lokazyon manké ankor in kou. Avan té lo tan d’avan é apré ? Lé riskab ankor d’ète parèye ké lo tan d’avan.