Nana dé zour konm sa. Na pwin ryin lé bon. Nana zanons mové z’wazo, out moral lé tinn, out tèt lé vid, out kor lé an mavouz. Mon vié té i di a mwyin, kan té konmsa « La vévé lé si nou baya »l’èr la mi sort l’opital pou war dé kamarad, dé kamarad mi koné byin, lé èk myin dan lo parti. Finn gingn in bon l’az lé dé. In té in pé malad dopi in bon koup dotan é la, la afayi é l’ot i vwyin gingn in kardiak avan yèr. Pou kosa mi an parl azot mon dé kamarad ? Dé zarboutan nout parti par l’fèt. Té la pou tyinbo mon min pou travèrs shomin, pou gonf mon rou kan mon rou té plat, té kosté èk mwyin pou fann papié dann z’éléksyon…… tousala. Kan nou té anparmi nou té koz ryink z’afèr kominis lontan. Rényon sélil, fèt témwaniaz, maloya an kashièt, Bèzman 67… zot dormi dann kann. tousa.

O diton, lo konba zot la méné té dir, té pa inn ti kréyon dérièr z’orèy, té falé an awar la pongn. Zot té karséré partou, tou l’tan, la lwa té maltrèt a zot, té mèt a zot la zol san rézon, nervi té shaboul la kaz, té i zigil a zot, kamarad té tié dann z’éléksyon. Voui té tié. Mwyin la aprann bonpé z’afèr èk zot, é sirtou mwyin la aprann èt kominis. Tou lé zour mi aprann èk zot. Sak mwyin la antandi souvan « In kominis i plèr pa kan i gingn koudkongn, in kominis la pa pèr bèf par la bav, in kominis i tranm pa dovan graton, d’ot koseman ankor ». Ryink koseman pou donn galo. Lokasyon pou mwyin di zot gayar, pa solman mon dé kamarad, tout kamarad kominis osi sak la fond nout parti é la fé grandi, sak la mèt do lo dann moulin pou fé tourné, ousinonsa la mèt do luil dann rouaz pou anpèsh gripé. Tout.

Nou dwa touzour avwar an mémwar banna. Zordi lé évidan ké san zot, san lo konba k’zot la méné nout péi soré ankor dann fénwar, lwyin dèrièr. Pou rovni si mon dé kamarad, mi di a zot tyinbo larg pa lo kor, mèm si pou inn, mwyin na in pé krintif zordi, li pran la pant, li la afayi pou vréman sé dérnié tan, plis dopi trwa zour, o pwin ni atann mové nouvèl. Mi di a li, avan tourn lo do, lès modél pou nou.