Mésyé, Médam, La sosyété, koz èk moin sé koz avèk in kouyon-sé o pyé d’lo mir k’i oi lo mason, kozman moin la mark an-o la sa in kozman l’Afrik, dizon in bon konsèy pou viv dann la sékirité. Biensir mi pans pa krokodil, landroi li lé, li va konprann si i zir ali. Si par ébzanp ou i di : « Krokodil ou lé vilin, ou néna in vilin figir »-in pé i di « in sal tète ». Mé ni pé pansé, sirtou si ni yèm bann zistoir, kisoi pou rakonté, kisoi pou ékouté, fitintan zanimo téi konpran langaz demoun é demoun i konpran sète zanimo. Moin pèrsonèl sa i shok pa moin… Astèr Pou arvir dsi nout kozman, sa sé in provèrb sa é konm tout provèrb li néna in sans : li konsèye anou mète anou a l’abri kan nou néna-si nou néna-nout dé mo pou dir kélk’in é si ni trouv i fo di ali sa. Mi rapèl in zour moin lété dann in léstaz é lo mèt léstaz téi di : « Si ou lé sir san pour san ou nora pa bézoin zamé-zamé d’zamé-sèrvis i moun, ou i pé zir ali. Si ou lé pa sir, i vo myé anval parol ou l’avé pou di ». An touléka i fo ou i pran out dispozisyon . Alé ! Mi kite azot rofléshi la dsi é ni artrouv pli d’van. Siplétadyé !