Nana in l’ékrivin i sort l’afrik, in ga k’i apèl Alain Mabanckou. Kan li la sort son péi, Lo Kongo, é konm li té fine ète arivé-konmsa mèm i di sa ! Son momon la di ali kozman moin la mark an-o la. Sé pou dir a li ké lé shoz i pé boujé dann bon konm dann mové sans. Zot i pé vni méyèr, zot i pé vni pli mové é sa sé in loi la natir-la natir imène bien sir, mé la natir tou kour. Sèl z’afèr ni doi konète sé ké lé shoz i pé pa rès an l’éta. Zordi ou lé an bone santé, ou na out manjé asiré, ou na lo nésésèr é mèm lo sipèrfli. Domin sé in n’ot zour é ni koné pa, mèm si ni pran tout nout prékosyon, koman domin va prézant pou nou. La momon lo ga moin la mark son nom an-o la, l’avé bien rézon é nout tout, tan ké ni lé, ni doi pa obliy in léson konmsa. In lésonn la vi ! Alé ! Ni artrouv pli d’van.