Oté

Avans in pa, rokil dé é lo néokolonyal lé touzour la

Justin / 3 avril 2020

JPEG - 43.6 ko

Pou komansé Zordi mi yèmré fé in pti rotour an aryèr dann tan Sarkozy. Zot I rapèl dann tan-la l’avé fé zeta zénéro épi shakinn la donn son lidé épi momandoné laba dann Paris lo prézidan-dann tan Nikolas Sarkozy-la fé in gran diskour pou fé lo bilan lo zeta zénérao. Nou lété moi d’novanm é l’ané d’apré l’avé in nouvo zéléksyon.

Si mi rapèl bien lo diskour Sarkozy l’avé konm I di rouv bann nouvo shomin. Si tèlman mi souvien parti kominis lété ziska kontan pou lo prozé d’dévlopman otosantré épi pou l’anploi avèk in kou d’pous pou l’anploi local. Rapèl azot dann tan-la nou téi parl la rényonizasyon bann zanploi. In pé la mèm fé in l’étid la dsi.

Sarkozy d’apré sak mi rapèl la bien kozé épi li la nome in ministrèss téi sort La Guadeloupe. Sito di, sito fé, abiyé konm in minis dann son kostime ministr la ministrèss la trouv sak téi fo fèr, lété pa in dévlopman otosantré mé sirtou ansèrv lo péi konm plate-form pou dévlop lo komèrs la frans-pa la n’ot, biensir - apré sa pou l’anploi rényoné la roul anou kari sou d’ri épi finalman lo bann propozisyon la gingn in l’antèrman promyé klass.

Aprésa l’ariv Hollande é movèz piosh li lété ankor pli pariziren ké parizien, san kilote ké san kilote. Dabor lo minis l’outremèr lété i sort dann zantiy é li lété pa tro la avèk nou. Aprésa l’ariv Erika, èl la fé in plan pou l’égalité réèl é konm Holand la kour avan mèm la mète an gard gouvèrnman La frans la bien antèr lo zafèr - li té tro okipé pou raz la pint bann travayèr épi bann rotrété ziska korona l’arivé… La nouvèl minis néna in don sé d’antortiye anou in poin sé tou.

Avans in pa, rokil dé, avans in pa rokil dé, énéokolonyal lé touzour la.