Mésyé, médam, la sosyété,mi souvien dann in komédi Rasine la ékri,dann in gran tirade, ou i pé antann kozman-la : « I aprann irlé di l’ot avèk bann lou. » Moin la touzour poz amoin késtyon la dsi, dann tan moin lété kolèz é firamézir la vi la passé moin la trouv in bonpé sans pou kozman-la.

In tan moin téi pans solman avèk in lou téi aprann irlé.Aprésa moin la pans téi falé mète lo lou par koté épi moin la kalkil sé avèk bann moun mové i aprann movèz shoz.Firamézir moin la romark dann bann fime zanimo, la vi l’avé aprann in kantité zafèr bann lou-konm l’aprann in ta zafèr tout bann zanimo.

Donk, moin la di dann mon kèr :i aprann pa solman irlé avèk bann lou é néna in kantité s’shoz pou aprann avèk bann zanimo an zénéral, bann zanimo sovaz an patikilyé.Zordi mi domann amoin si avèk bann zanimo l’om néna poin i ta zafèr pou aprann dsi la vi sirtou zordi ké l’imanité lé dann difikilté li ariv pa kontrolé.Kosa par ébzanp ?É si téi pé aprann in doz l’imanité avèk bann zanimo é si dann nout sityasion nou téi pé kont dsi zanimo pou anrishi nout lékol la vi ?

Alé ! Mi kite azot rofléshi la di é ni artrouv pli d’van. Sipétadyé !