La GB la fé sa movèz tète épi la di, pou èl la déssizyon l’ONU lété nul é non advenu, mé final de konte la préssion internassyonal la fini par obliz Langlétèr avèk lo konssantman lé Zétazini d’négossyé pou rann Maurice bann zil Chagos.

Lo troi oktob nou la aprann Maurice épi Langlétèrv l’avé tonb dakor pou rann Lo téritoir Chagos la Répiblik Maurice avèk in bémol koté d’Diégo Garcia : bann shagossien lé pa rokoni dann zot droi rézide dann Diégo — Mi panss zot i souvien kan bann shagossien téi manifèst dann Maurice, zot téi kriye « Rann nou Diégo » é zistoman oila ké dsi diégo Garcia zoti gingn pa konplèteman satisfakssion.

Bann shagossien lé kontan sète akor-la sof dsi lo poin Diégo Garcia. Sé pou sa dann zot assanblé zénéral zot la déklar, la lite lé pa fini é zot i vé zot popilassion i roviv dann Diégo galman… Maurice ossi la kontante ali avèk lakor mé ni koné, dann zète afèr Maurice la toush lo jakpot :

Dabor son onèr sar réstoré avèk lo rotour Chagos sou son lotorité. Ansuite si noute voizine lé dann lobligassion la baz militér anglo amérikène i rèss dsi zot téritoir zot va toush in loiyé, anfin zot léss pass maritimei sava goumanté ziska trape 2 milion km2 dann in psséan avèk bonpé rishèss.

Si sa i apèl pa in Jakpot mi koné pa koman sa i apèl ! A bon antandèr salu !

Justin