Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité dopi in koup de tan i paré zot l’apré roviv lo soisant zané listoir (sé zot k’i di sa) lo PCR. Tout lé bon pou romète pasé-la anlèr : kozman dovan l’moun par si, par la, fime tourné an maron, késtyon-répons – interview i apèl sa. Avèk konm lintansyon arfé viv lo mor. Mi roprosh pa, mé i anpèsh pa moin an moin-mèm pou fé la romark : kan ou na pi d’prézan, kan out l’avnir lé boushé, ou i rogard par déyèr dann rétrovizèr avèk léspoir antrovoir in pé d’klarté. Sa lé normal sa ! dizon lé imin-Tok ! Pran sa pou toué !

Justin la fé pou répons :
Mon vyé matant k’i koz toultan la boush rouvèr, i étone pa moin, in kozman parèye vénan dé ou. Mé, mi trouv ou lé tro katégorik dann tout sak ou i di-pli pir ou lé dann fo… Mi note bien sak ou la di dsi lo pasé lo PCR, dsi son prézan épi dsi son l’avnir é mi kash pa dir aou, out sifizans va fini par kass par boute .
Mi rapèl aou sinploman in kozman lo mèr Sin-dni la di néna dé-troi somenn pou prézant la konférans Elie Hoarau dann la grann sal la méri. Li la di konmsa : si téi pèye in droi d’otèr dsi bann zidé ébin parti kominis noré té rish… Pou moin sa i vé dir, toultan k’in parti néna zidé pou propozé, toultan ké la plipar d’moun i partaz so bann zidé, si lo fé i kouv sou la sand, i tard pa pou li ropran vigèr épi pou li mont an flam.
Astèr mi vé dir aou kant mèm listoir, kisoi sète in péi, kisoi sète in parti, kisoi sète in l’évènman ladan mèm néna bann rasine é lo rasine sé la baz é si la baz lé la, si bann rasine i plonj dann la vi lo pèp ébin la baz lé bien vivan… Matant lindi soir moin la gingn la shans oir in fime an noir épi an blan tourné an maron l’ané 1967 dsi in gran bataye améné sète ané-la par nout parti zistoman, ébin kan ou la fine oir tousa militan, tousa dirijan, dann i konba konmsa ou i domann aou in sèl zafèr : dann kèl boi banna lété fé don pou gingn amenn la lite konmsa. É konm lo boi lé bon lo bann ropouss sar bon zot tour. Tok ! Pran sa pou ou !