Oté

Avèk kisa ni sa fé z’afèr, si ni fé pa avèk bann péi lé z’alantour !

Justin / 6 zwiyé 2018

JPEG - 43.6 ko

Pétète sak mi sava dir azot zordi ankor i sava fatig z’ot tété-konm i di dann langaj popilèr. Pou kosa mi di sa ? Pars mi rapèl bien diskour Sarkozy kan la fé bann zéta zénéro lo dévlopman l’outre mèr : in diskour istorik, avèk in bonpé poin lété bon pou nou, mé domaz lété déza in pé tar pou mète ali an pratik.

Mi vé parl azot lo dévlopman andojène si zot i vé otosantré : in éstratézi pou bien roplas anou dann l’androi ni lé, dann koté ouest loséan indien, avèk lo bann voizin ké ni koné é dann in léspri gagnan-gagnan : gagnan pou lé zot épi gagnan pou nou. Sé konmsa i fo anparl lo ko dévlopman, non ? Sé konmsa mi konpran in kodévlopman inn foi k’lo kolonyalism sar fine siprimé avèk bann moiyin pou nou épi pou lé zot pran z’ot résponsabilé par raport bann pèp l’indyanoséanie.

Ma dir azot fransh vérité, mi pass in bone parti mon tan pou lir bann nouvèl Madégaskar, Maurice, Comores, Sésèl épi alon pous in pé ziska l’Afrik. Dann mon tète mi di : bann péi-la lé aoré shanjé pou vréman é mèm zot l’apré modèrnizé, dévlop zot lindistri san obliyé l’indistri la konésans. Shak foi mi rogrète pou nou Pal Vergès la pa gingn fé tout sak li téi vé ziska la finisyon.

Mi sava pa roprann lo bann poin prinsipal bann projé Paul Vergès, mé mi pans bann léktèr nout zournal i koné. Pétète pa ! L’èrla sak i koné néna lo dovoir pou difiz sa dann l’opinyon. An touléka, mi koné Paul Vergès prézidan La Réjyon la travaye in bonpé avèk Madégaskar é mi pan li l’avé rézon pou nou épi pou Madégaskar, pou yèr, pou zordi épi pou domin.

Avèk kisa ni sava fé d’zafèr, si ni fé pa avèk bann péi lé zalantour ? Madégaskar an parmi bien antandi mé pa solman...