Matant Zélida la ékrir justin :

Mon shèr nové, mon spès salté, rouj-de-fon dovan l’éternité, mi domann amoin bien kosa zot i atann dsi la késtyonn la vizit lo prézidan dan la finisyonn la somenn. Pli pir, moin lé a d’mandé kosa lo takonn moun la vot pou fransoi holland té i atann o jis.
Mète Sarkozy déor ? Dakor, mé sa la pa in politik. La prèv an é ké dopi lo dis mé 2012, i pé pa dir lé shoz la bien avansé dan lo sans zot téi atann. Mi antan in pé dmoun i di,Fransoi Hollande la roul parti kominis dan la farine é sète-la lété bien kontant. Koman i di sa ankor ? Koku, batu é kontan ! Tok pran sa pou toi !

Justin la fé pou répons :

Mon vyé matant k’i koz touzour la boush rouvèr, sé konmsa ké ou i konpran lé shoz ou ? Sèl shoz ké ou i rogard sé galé dann nout soulyé. Inn foi ou lé fine oir sa, lo rès ou lé pa la èk sa ! Poitan, nana dé shoz lé pli inportan ké sa pou lo pèp rényoné. agard solman tout lo bann klignotan rouj l’apré alimé inn apré l’ot konm la limyèr dann boit de nui.kisoi dsi la mortalité bann zanfan, kisoi dsi nout prodiksyon k’i dégringol an flèsh, kisoi dsi l’ilétrism i diminyé pa, kisoi dsi la fèrmtir in paké l’antropriz… kisoi ankor dèrnyé dézas anonsé, la kriz mortèl dann la kane a sik.
L’èr-la lé vré, ni tienbo lo kayé dsi tout bann promès gouvèrnman i tienbo pa,é ni atann ali dann tournan, mé pa solman, pars zordi anplis ké lé ot shoz, i fo anpèsh nout prodiksyon kane mor..pou garanti bnout prézan épi nout l’avnir.Sa sé pa in shoz i konsèrn tout bann rényoné, é sa i doi pa zète in kékshoz pou diviz anou mé pou nou fèr l’union. Si ni fé l’union, ébin lé shoz lé riskab bouj dann lo bon sans. Tok ! Pran sa pou ou !

Justin