Oté

« Avèk la pasyans ou i pé gingn mèm oir la trip fourmi »

In kozman pou la rout

Justin / 31 mé 2018

JPEG - 43.6 ko

I prétan dir kozman-la sa in provèrb bann zantiyé. Pou étone anou, li étone anou. Pou koué ? Pars mi pans pa fourmi néna lo trip pou vréman konm poul, zoizo, torti épi tout sort zanimo. Lé vré, moin la pankor agard dsi l’intèrnèt mé sof, moin la pa bézoin konète sa. Sèl z’afèr, mi rotien la-dan, sé ké si ou i port bien antansyon ou i pé oir dé shoz ou i oi pa dann promyé vizé. Sak mi koné kant mèm sé ké si ou i port pa antansyon ou lé riskab pass par koté bann z’afèr inportan an touléka bann z’afèr ou i soupsone mèm pa k’i égzis. Biensir, konm sé in provèrb ni pé lèss par koté lo fourmi épi son trip pou akrosh anou avèk l’ésansyèl é l’ésansyèl sé zistoman sak moin la mark an-o la.I di pa la pasyans i géri la gal ? Alé ! Mi kite azot rofléshi la dsi é ni artrouv pli d’van. Sipétadyé !