Ni koné san tardé La Rényon nora in milyon z’abitan épi i pans k’aprésa v’arété. D’apré sak i di nou nora fini fé nout tranzisyon démografik. Donk nou la poin pou inkyété ! Sof si :

Si Mayotte i trap sink san karante mil z’abitan é sa i doi pa tardé si an plis « L’il bann siltan batayèr » konm té i di sa avan i gingn pa fé son dévlopman ékonomik. Akoz li gingnré d’trap sa par lo mèm shomin ké nou la pasé, départman fransé vi ké nou ni ariv pa dévlop anou pou vréman.kisa i pé dir amoin ousa so bann z’abitan an plis v’alé ?

Si lé troi z’il komor k’i rès-Grann komor, Anjouan, Mohéli - zot osi zot i dévlop pa plis k’i lé koméla é si zot i trap in milyon sink san mil z’abitan konm lé prévi. Ousa so bann z’abitan an plis v’alé ?

Si Madégaskar ké nana déza 24 milyonn moun i trap 55milyon dann pa lontan - l’ané 2050 é si zot i dévlop pa sifizaman o sinonsa la mizèr i kontinyé tap dsi zot konm koméla avèk in siklone shak ané é in kou d’séshès konm nana koméla tazantan. Ousa lo moun lé an plis v’alé ?

Lé vré avèk la si i koup de boi é pa pliské sa. Mé si La Frans i koup, i transh isi i kontinyé dann son shomin an kouyon. Si par ébzanp son l’égalité réèl sé arienk in pyèz pou bann fatra. Kosa v’arivé dann kék z’ané s i pran pa prékosyon ? Dovine dovinaye zot mèm.