Ala in kozman, mi pans lé intérésan, pars dan la vi nana plizyèr kalité d’moun. Nana sak i pran par, pli-z’ou-moins, kan i fé in n’afèr : i intérès, i fatig in pé la tète, i fé oir lo z’afèr nana in plas dann son pansé. Aprésa nana sak lé pa la avèk sa. Dann la dozyèm kalité d’moun, i pé méte bann m’anfou, k’i pé apèl osi bann s’anfout-sa.

Lé z’inn i donn la min, i donn l’idé, i donn kou d’min konm i di : bann moun-la i pé apèl azot bann konstriktèr, bann moun pozitif. Tan-k’a lé zot i pé pa kont dsi zot pou fé in n’afèr d’bien, pou fé in l’avnir, pou batir kékshoz.

Mi pans nana pou diskité la dsi. Pou kosa ? Pars, suivan lo ka, in moun la pa touzour parèy. I pé z’ète konmsa dann in ka épi ète otroman dann in n’ot ka. Konm i di la pa lo zirouète dsi lo toi k’i shanj diréksyon mé sé lo van. N’i artrouv !