I di galman : « Avèk m’anfou i fé pa la kaz ». Sansa « Avèk m’anfou i vien pa doktèr. » Sa i vé dir si ou néna in prozé ou i vé gingn fèr i fo ou i pran sa konm in n’afèr inportan pou ou - si lé inportan pou ou ou i fors pou ariv o bi. Si ou i fé sa an foutan, si ou i mète pa la bone volonté, lé sir ou i gingn ar pa fèr. Mi souvien é sa sé in zistoir vré la éspas néna in pé d’tan déza : in momon l’avé in takon z’anfan é èl pèrsonèl téi koné près pa lir, près pa ékrir mé èl téi suiv travaye son bann z’anfan. Koman sa ? El téi fé résite loson épi té i suiv a l’orèye, èl téi rogard kayé é si lo dovoir lé ratiré, èl téi fé rokomansé. Parl pi son gran fouète pasé dan la sand : ménas mé tap pa ! Si tèlman tout bann zanfan lé réisi an avoir in métyé… Dann tan l’instriksyon té ariv fé mont aou l’asansèr sosyal pli fasilman ké koméla. Alé ! Mi lèss azot rofléshi la dsi é ni artrouv pli d’van sipétadyé.