Moin la fine antann demoun apré di : « Avèk mèrsi i pous pa sharyo ! ». Sansa : « Avèk mèrsi i sar pa la boutik ! ». Dizon sé topète pou morète sirtou dopi ké so salté l’arzan la anvayi la tèr. Ou i vé manzé ? Larzan. Ou i vé boir in n’afèr ? Larzan. In zouzoute pou out marmaye ? Larzan ; tan é tann shoz, koméla si la pa larzan ou i ariv pa o bit. Sak nana son pourkoi, i san pa sa konmsa, mé sak i an mank li san doulèr pasé. Poitan larzan nora pi z’ète solman, konm i di, in tiktak pou fé l’éshanjmarshandiz… In tan dann l’Afrik kokiy té i sèrv pousa... Lété pa blizé bate la moné ! Té pa blizé tir bann biyé sou prèss ! Oui té pa oblizé, mé sa l’ariv konmsa é koméla sé lo larzan li mèm k’i roprézant la valèr. In valèr virtyèl bien sir mé k’i fé la diférans rant sak nana é sak na poin. I donn la fors lé z’inn é li afaye lé zot. Alé ! Mi éstop tèrla é mi invte azot, si zot i vé, kass z’ot koko la dsi. Ni artrouv pli d’van sipétadyé.