In mèrsi sé in n’afèr i kont dan la vi. I fo dir, konm la politès, li lé né avan nou. Sa sé in n’afèr i fo aprann marmaye é i fo pa ou i di pi pars ou lé fine désalé. Mé zot i koné bien, koméla, é dopi lontan, larzan i zoué in gran rol dan la vi. Sé pou sa, moin la mark kozman an o la. Konm di lo kont tout sé in n’afèr d’arzan é larzan la anvayi partou : i di pa sé lo nèr d’la guèr ? I di pa galman dann in vyé séga kréol : « Si la pa l’or, ni maryé pi » ? Si zot i agard télé, é si zot i koné in pé lé shoz zot i pé di dsi in térin fotbal bann profésyonèl néna tazantan plizyèr santène milyon l’éro si ou i kont sak lé marké dsi bann kontra lo bann zouèr. Moin néna dann mon tète in kozman moin la tir dann lé plédèr, in komédi Rasine é la-dan i di : « San arzan lonèr lé k’inn maladi ! ». Alé ! Mi kite azot pou rofléshi la dsi é ni artrouv pli d’van. Sipétadyé !