Médam, Méssyé, la sosyété, koz èk mwin sé koz avèk in kouyon mé sé o pyé d’lo mir k’i oi lo vré masson. Mézami, si mi di azot kozman-la, èm si li lé bien koni, mi doi dir mi aprésyé pa li bien. Akoz ? Si lé vré k’i pé dir, tout pène i mérite salèr, la shans pou nou, nou la viv dann in sosyété bann bénévol la fé in bonpé zafèr. Mi souvien la kaz, kan mwin lété pti mon papa téi sava fé pikir partou dann Boi d’Nèf san domann arien pèrsone-lété in tan l’avé poin zinfirmyé. Mi rapèl ossi mon momon instititriss té i fé travaye bann marmaye an pliss pou pass sèrtifika. Donk, si ou l’avé la shanss viv konmsa, zot i konpran mi pé pa èm in kozman konmsa. Astèr i di ossi, i travaye pa pou la po patate é sa mi konpran ossi. Mi lèss azot rofléshi la dsi é ni artrouv pli d’van. Sipétadyé.