Oté

« Avèk mové zèrb i fé bon tizane »

In kozman pou la rout

Justin / 20 octob 2020

JPEG - 43.6 ko

Mé zami, mi pans moin la fine marké kozman-la, mé zordi moin la désid anparl dé li ankor in kou. Pou kosa ? la pa pou son sans prop, pars promyé dogré li lé fasil pou konprann épi konm moin la fine di azot in parol shamane té i di konmsa : « La poin mové zèrb, néna arienk demoun i koné pa bann plant. » ? In foi ké moin la di sa, ni pé abord lo déyèm dégré sansa si zot i vé lo sans figiré. Figir azot an parmi l’moun, néna bann bone tète, épi bann movèz tète. Bone tète, la poin difikilté avèk pars li amenn son bark korèktoman. Mé movèz tète, zot osi, momandoné d’la vi, zot i vyinbou sirmont zot sityasion d’movèz tète pou fé dé shoz bien : mi rapèl fitintan l’avé laba dann la vil Paris, in soidizan bon a rien. Ala ké dofé i pran dann in lapartman. Tout moun bien i kour kilote dan la min, mé lo movèz tète i apersoi in marmaye pandiyé avèk balkon. An dé tan troi mouvman li la fine ariv an-o, an dé tan troi mouvman li la fine sov lo marmaye. Konm koi la pa touzour bann bone tète, i fé sak i fo kan i fo. Alé ! Mi kite azot rofléshi la dsi é ni artrouv pli d’van. Sipétadyé.