Mézami, mi panss zot la fine antande kozman-la a moinss ké zot i sorte déyèr solèye osinonsa zot la touzour viv dann boite koton dann in sossyété san kontradikssyon. Mé si zot la viv konm toulmoune issi dann noute sossyété rényonèze i fo zot la antande sa.

Kossa sa i vé dir par l’fète ? Sinploman alé pa kontraye demoune… mé apré fé a oute tète. O fon, mi panss sa in bon filozofi d’vi : wi fé sanblan sédé é wi fé konmsi la lang la poin lo zo é wi obliye toutsuite sak ou la di, pou fé otroman.

Mé mézami, alon rokonète toutsuite sa la pa in n’afèr a fèr longuèr d’tan pars si i fé konmsa demoune va di : sa in moune na poin d’parol é donk san tardé la pi pèrsone pou done aou son konfyanss é l’èr-la la vi lé riskb ète dir pou ou.
Alé ! Mi kite azot rofléshi la dsi é ni artrouv pli d’van. Sipétadyé.

Justin