Zot i diré zot in n’afèr konmsa ? Dimansh dèrnyé, a-tèrla Maurice, in pé la sign in APE. Kossa i lé sa ? Sa i apèl in lakor pou l’parténéraz dann lékonomi, mé pli sirman sa sé in tik-tak k’i vé dir i aplik liltra-libéralism dann komèrs rant bann péi. Kissa la sign sa ? Madégaskar, Maurice, Sésèl épi Zimbabwe, épi ankor l’Érop. Oté lé ga ! Bin sa lé pa forséman bon pou nou, lé mèm danzérab pou nou.
Ni pé dir in n’afèr : nou té pa la, nou la pa sign sa, nou lé pa la èk sa. Zot na ka gard pou zot z’ot shifonn papyé ! Ay-ay-ay, Justin, ou l’apré pèrde la boul ! Si nou la pa signé, mé d’ote la sign pou nou, alor lo z’afèr lé valab. Bin kossa lo pti t’onm kourt, té i apèl lékonomi andojène, sansa in nouvo kalité d’gouvèrnans ? Tousa i konte pou la po d’patate, sa sé kozman anlèr, kozman pou fé dézord solman ! Pars kan bann marshandiz va rante issi dirèk, kissa va anpèsh azot rantré ? Pèrsone ! Kan nout marshandiz va sèy rant dann péi déor, vi k’nout pri lé shèr, pèrsone i ashète ar pa ! Nout kanar sar noir... Lé vré, l’APE i aplik pa toutsuit an in zour, mé o-firamézir. Lé vré ! Mé i fodré ni gingn fé mirak, ni gingn fé fèrm la guèl toute bann malfondé i vé pa nout lékonmi i dévlop, ni gingn fé l’inyon rant nou plito ké diviz anou, mé i diré lé pa pou domin... Pou konplète lo tablo, na in pé i vé k’i siprime l’oktroi d’mèr, pars d’apré zot, sé par sa ké la vi lé shèr. I pé dir azot, zot na tor, zot i s’anfou, zot i kontinyé z’ot romans la mok. Poitan, sé l’oktroi d’mèr k’i pèrmète anou défann in pé nout prodiksyon, sé sa k’i pèrmète bann komine an avoir in pé larzan pou an avoir in bidzé konm k’i fo. Sa sé, konm di lo kont, nout garanti.
L’APE i rode mète anou tou-ni, na solman l’oktroi d’mèr k’i ansèrv anou, in pé, konm kash-mizèr.

Justin

Lésplikasyon inn-dé pti mo :

Garanti : protéksyon.

Kash mizèr : kash sèks.

Romans la mok : shanté i vo pa aryin.

I konte pou la po d’patate : i vo pa ryin.

Malfondé : demoun mové fon.

Shifonn papyé : in traité bann péi i fé pa in konte ansanm.